প্ৰেম

মূল- তসলিমা নাসৰিন ; অসমীয়া ভাৱানুবাদ- জোনা মহন্ত

যদি মই তোমাৰ বাবে চকুত কাজল লগাবলগীয়া হয়,

চকু মুখত প্ৰসাধন কৰিবলগীয়া হয়,

গাত সুগন্ধি চটিয়াবলগীয়া হয়

যদি আটাইতকৈ ধুনীয়া শাৰীখন পিন্ধিবলগীয়া হয়,

কেৱল তুমি দেখিবা বুলিয়েই মালা-খাৰু পিন্ধিবলগীয়া হয়,

যদি তল পেটৰ মেদ,

ডিঙি বা চকুৰ ভাঁজ কৌশলেৰে লুকাবলগীয়া হয়,

তেন্তে তোমাৰ স’তে আন কিবা… প্ৰেম নহয় ।

প্ৰেম হ’লে মই যেনেকৈয়ে নাথাকোঁ

যিকোনো খুঁত, ভুল ভাল, অপৰিপাটি হৈ থাকিলেও

মই যেনেকৈয়ে তোমাৰ আগত থিয় দিওঁ

তুমি ভালপাবাই ।

কোনে কৈছে প্ৰেম খুব সহজ বিচাৰিলেই হয় !

ইমান যে পুৰুষ দেখোঁ চাৰিওফালে, ক’তা , প্ৰেমিকতো দেখা নাই !!

জোনা মহন্ত ।