ফাগুন

প্রকাশিত- দৈনিক গন অধিকাৰ, ২৩.০২.২০২২

মই যদি ফাগুনৰ দৰে  

হ’ব পাৰিলোহেঁতেন

কাৰোবাৰ হৃদয়  উন্মাদ কৰি

ৰঙা মদাৰ হৈ ফুলিলোহেঁতেন ।

ফাগুনৰ দৰে সাহসী হ’ব পৰা হ’লে

বৰদৈচিলাৰ দৰে আহি

নি:শেষ কৰিলোঁহেঁতেন

অহংকাৰী বিশ্বাসঘাতক দেশদ্ৰোহীক ।

ধূলিৰ ধুমুহাৰ দৰে

ধূলিসাৎ কৰিলোহেঁতেন

অজ্ঞানী সমাজৰ অন্ধবিশ্বাসক

ফাগুনৰ  দৰে ৰঙীয়াল হ’ব পৰা হ’লে

আবিৰৰ ৰঙেৰে

আঁকিলোহেঁতেন ৰামধেনু আনৰ হৃদয়ত৷

নোৱাৰোঁ যে মই ফাগুন হ’ব

সেয়ে ৰাখিছোঁ সকলো

মনৰ মাজত হেঁচি,

মাথোঁ বিচাৰো

ফাগুনৰ উতনুৱা বতাহজাকে

উৰুৱাই নিকা কৰক সমাজৰ

বিশৃংখলতা আৰু

সকলোৰে মনৰ দুৰ্ভাৱনা ৷

কঁহুৱা বনৰ দৰে কোমল হৃদয়েৰে

সজাই তোলক নিজৰ লগতে

আনৰো জীৱন

পলাশ শিমলুৰ ৰঙেৰে ৷